TOW#626 — Одговорност

Одговорноста е многу голема работа. Прво, таа не се дава тукутака, туку кога ќе ти ја дадат станува уште поголема. Но, дали знаеме да ја искористиме? Дали знаеме да ги искористиме нејзините придобивки?

Се сеќавам, кога започнуваа моите работни искуства, започнав од чирак, што се вели, и дури ме испраќаа и бурек да им купам. Но со текот на времето, почнав да напредувам, па од една на друга позиција, па во друга организација итн. итн., и еве ме сега тука.

На почетокот сето тоа ми беше чудно, ама со тек на време сфатив дека и купувањето бурек е одговорност. Имаше некои колеги, во тоа време, негодуваа за тоа каков бурек сум им купил, а некои велеа: од сега само ти ќе ми/ни земаш бурек! Ќе си каже човек, еј бурек, голема работа, ама суштината е доколку ти доверат нешто да направиш, гледаш да го направиш најдобро што може и да дадеш максимум од себе.

Изгледа многу брзо сфатив дека треба да се внесеш со максимум во тоа што ти е доверено, сè со цел да си докажеш прво на самиот себеси, па и на колегите и тие над тебе, дека успеваш во тоа што го правиш и да ја добиеш нивната доверба, дека ако ми го доверат тоа што ми го дале, ќе го направам како што сме се договориле, па и повеќе од тоа!

Но, не знам дали е тоа така и сега. Имам чувство оти луѓето бегаат од одговорноста што некој им ја доверува или тоа што ќе го направат, го прават „ради реда“, не даваат максимум од себе! И со самото тоа, одговорноста преоѓа во неодговорност!

Одговорноста е многу важна работа исто како и довербата, потребно е многу време за да ја добиете, но затоа, може да ја изгубите за само една погрешно направена работа. Со одговорноста, растат и вашите позиции на работа/дома, но и вие самите напредувате.

Не знам кои совети да ви ги дадам за одговорноста, но она што можам се следниве:

- Давајте максимум од себе!

- Преземајте акција и инцијативи!

- Немојте да лажете!

- Ако не знаете, прашајте!

- Немојте да премолчувате, туку извршете!

- Немојте да мислите дека претпоставениот нема да примети, па затоа да не извршувате некоја работа!

- Помогнете им на колегите!

- Преземајте одговорност за грешките! Никогаш не ги обвинувајте другите!

- Учите од грешките.

- Ич да не ви е гајле за другите колеги, но учете од тие што добро ги извршуваат работите!

- Немојте да ги озборувате колегите! Немојте да паѓате на моментот: па они не работат, нема ни јас!

- Фокусирајте се на работата и немојте да дозволувате лесно да ве дефокусираат.

- Бидете подобар после секоја извршена работа.

- Давајте фидбек.

- Бидете секогаш подготвени и навремени во извршување на работите.

- Никогаш не се откажувајте!

Знам дека си знаете и повеќе од ова, но она што ќе ве замолам е: Немојте да забушавате! Ако сте рекле ДА, извршете го и повеќе од тоа што ви е дадено! Не може да барате да ви се даде, а вие за возврат да не понудите ништо!

Бидете одговорни,

@kalin.babusku