TOW#656 — Да (за)сукаме или да кукаме

Пред извесно време со мојата колешка се најдовме пред еден интересен предизвик: за релативно кратко време да завршиме една голема и одговорна задача.
Седнавме, направивме план и сфативме дека имаме две опции:

1. Да ги “засукаме” ракавите, да се фокусираме и да тргнеме напред. Да го извлечеме максимумот од времето што ни е останато и да дадеме сè од себе за да завршиме што повеќе.
или…
2. Да паничиме, да си се жалиме и туфкаме народски кажано и после од кога ќе помине да си речеме — немавме време.

Предизвик ни беше на двете да ја прифатиме првата точка, нормално. Бидејќи јунаците на мака се познаваат. And guess what? Излезе еден преубав проект, со оглед на времето што го имавме (сега веќе можам да го кажам ова, бидејќи сум сигурна дека дадовме сè од себе за да се заврши успешно). Проект на кој се гордееме и сигурно ќе го даваме како пример во иднина, проект кој ќе ни биде временска рамка за споредба за следни слични на него. Покрај тоа, се збогативме и со едно поинакво искуство до сега.
Но, сето тоа, го направивме пред сè за самите себе:

• За да си докажеме дека можеме;
• За да си ги поместиме сопствените граници;
• За да си ги тргнеме сопствените стравови

Некаде прочитав многу убава изрека која гласеше од прилика вака: “Aко им дадете на соништата онолку енергија колку што давате на вашите стравови, ќе видите колку лесно и брзо можат да се остварат!”
За нештата да се остварат со успех, треба да верувате во она што го правите и да го сакате истото. Ако го правите од што морате, или дека некој друг ви наложува, или за друг да ви каже “браво”, тогаш немојте ни да почнувате.
Зацртајте си цели и задачи за кои самите ќе се мотивирате и ќе бидете горди кога ќе завршат. И колку и да звучи како клишè, завршете ги затоа што вие го сакате тоа, од срце. Само така ќе имате успех.
На крајот од денот, најголемото “Браво” треба да си го дадете вие самите.

Со успех во промените,

Елена Мартиновска

Член на тимот
МАКЕДОНИЈА-ЕКСПОРТ Консалтинг
www.macedonia-export.com